2025 上旬

* 「許善」生日助人計劃🎂 2025年2月生日之星✨ *

2025.2

感謝以下14位2月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐KH Wong ⭐Nelson Yeung ⭐Agnes Hui
⭐Helen Ha ⭐Reyna Chu ⭐Antheia Tam
⭐Tam Ping Cheung ⭐Ronald Kwan ⭐Elseda Shum
⭐Christina Kam ⭐Ivan Ma ⭐Phoebe Wong
⭐James Mak ⭐Helen Yim

* 🎁✨ 長者探訪活動 *

2025.01.25

當日義工們一早喺灣仔集合，準備好福袋同及小禮物，出發前往九龍東，探訪咗7個長者家庭！❤️

今次嘅福袋內除咗各種食品同日用品，仲包括由書法班義工親手寫嘅賀年揮春🧧。義工們親自幫長者將揮春貼好，為屋企增添新年氣氛！🎉

當然更要多謝我哋福米嘅贊助商金隆，令到我哋嘅福袋更具份量。

除此之外，義工亦幫忙仲送上聖雅各福群會特別準備嘅禦寒小電器，包括棉被、暖風機、電磁爐同電飯煲，喺呢個寒冷嘅天氣裡，呢啲禮物真係十分合時，為長者帶嚟更多溫暖同方便。♨️

探訪期間，義工們同長者親切交流，同時拜個早年，希望佢哋蛇年身體健康、平安快樂！🐍 長者見到義工細心嘅陪伴同滿載心意嘅禮物，都露出溫暖笑容。🥰

感謝所有義工嘅用心付出及聖雅各福群會嘅安排，希望我哋嘅關愛可以讓長者感受到更多溫暖同支持！

* 🎭 川劇變臉表演觀賞✨ *

2025.01.24

「許善」又一次將中國非物質文化遺產帶到校園，今次我哋首次來到天水圍嘅香港青年協會李兆基小學！

是次活動特別邀請到星級川劇變臉大師牟師傅，為同學帶來一場精彩絕倫嘅變臉表演！🌟 台上瞬間變出多款色彩繽紛嘅面譜，同學仔目不轉睛，驚嘆連連😱！牟師傅其後更走落台，近距離表演並與學生握手互動😍，令同學更加投入，親身感受呢項藝術嘅魅力！🙌

重頭戲當然係台上互動體驗！牟師傅邀請部分同學上台，即席教導基本嘅變臉動作。雖然係臨場學習，但學生表現有板有眼👏，現場掌聲此起彼落，氣氛高漲！

活動仲設有變臉知識問答環節🎉，學生仔踴躍參與，答啱問題就可以攞到由許善義工親手織嘅中國吉祥結🧧，成班同學都搶住想攞，場面好熱鬧！

衷心感謝牟師傅全力支持，帶嚟咁精彩嘅表演！亦多謝義工們嘅協助，令活動順利進行！最後亦感謝校方的邀請及安排❤️。

* 🎉✨ 許善吉祥揮春迎蛇歲街站大成功 ✨🎉 *

2025.01.18

首次擺街站活動圓滿結束，大受街坊歡迎！🙌 義工們一早就忙住Set場，未到10點就已經有街坊嚟排隊等領取揮春🧧，氣氛非常熱鬧🎁！

今次活動係由「許善」書法班高級班全體人員全力負責💪。經過一年導師義工及「許善」幹事Ernesto嘅悉心指導👨‍🏫，學員們已經能夠寫得一手好字💯，對傳承及推廣中國書法呢一種非遺文化不遺餘力，因此決定擺街站，透過實際行動將書法藝術帶畀大眾！🖌️❤️

活動前已準備咗數百張揮春，結果短短時間內就派晒🙀！義工們即席揮毫，不但寫揮春，仲應要求寫春聯，全日加埋寫咗接近成千張👍！街坊拎住心意滿滿嘅揮春，笑容滿載而歸，真係好暖心♨️！

喺活動中，街坊除咗可以領取揮春，仲有機會親身接觸中國非遺文化—書法藝術🖌️！義工們仲特別教導小朋友用毛筆試寫，讓下一代從中感受非遺文化嘅魅力，增添文化氣息，希望可以埋下種子，未來可以將傳統藝術傳承落去。❤️

可惜下午開始天氣轉冷，大風又凍🌬️🥶，活動喺4點多提早結束，但喺相片中可以睇到街坊嘅互動同笑容，可以話活動獲得一致好評🥰！許善管理層Iris更親臨現場打氣，請義工食午餐，令士氣更加高昂💪！

感謝書法班導師Ernesto嘅帶領及每位義工嘅努力，將滿滿嘅新春祝福帶畀社區！🐍 喺度提早同大家拜個早年，祝各位蛇年身體健康、心想事成、行大運！🧨

* 🎉✨ 2025年一月北角派飯派福袋活動 ✨🎉 *

2025.01.12

2025年嘅第一次派飯活動正式展開！即使寒冷天氣警告生效🥶，義工們依然無懼寒風🌬️，一早9點準時喺北角集合，用行動傳遞溫暖！❤️

今次活動除咗派飯，仲準備咗迎新年福袋🎁，內有義工們親手寫嘅賀年揮春🧧、冬菇、臘腸、白米同多款食品及日用品，充滿節日氣氛！🫶 義工們親手為公公婆婆送上一份份暖心又充滿祝福嘅禮物，希望佢哋過一個幸福快樂嘅新年！✨

希望呢份暖笠笠嘅關愛♨️，能夠令長者感受到節日嘅溫馨同喜悅！特別感謝善長Susan Chu女士贊助是次活動🙏，亦感謝每位義工嘅努力同堅持，為社區帶嚟愛與希望！💪

* 🎉✨ 迎新年包福袋活動 ✨🎉 *

2025.01.11

農曆新年🐍將至，「許善」再次用行動傳遞溫暖！❤️ 今次嘅迎新年包福袋活動，為有需要嘅長者準備咗滿滿嘅心意！

福袋內容豐富，包括「許善」中國書法班義工親手寫嘅賀年揮春🧧、應節食品冬菇🍄及臘腸，另有福米🍚、人蔘茶包、即食栗子、粟米湯🍲及紙巾🧻，充滿節日嘅祝福同關愛😘。

感謝義工們嘅齊心協力🫰，同時亦多謝贊助商金隆捐出福米🙏！期待呢份福氣可以喺新年帶俾大家更多笑容同溫暖！💖

* 「許善」生日助人計劃🎂 2025年1月生日之星✨ *

2025.1

感謝以下13位1月生日的善長人翁參與「許善」生日助人計劃，將部分預備慶祝生日的支出轉為捐款，支持「許善」服務社會。「許善」祝各位善長生日快樂🥳、身體健康💪同時亦預先為受惠人士感謝善長的慷慨解囊🙏。(排名以出生日子先後排列)

⭐Simon Jim ⭐Brenda Chark ⭐Ho Yee Lin
⭐Raymond Kung ⭐Gilbert Wong ⭐Anthony Kwok
⭐Mabel Leung ⭐Wendy Tsang ⭐Natasha Lee
⭐Sophia Yim ⭐Kimberley Cheung ⭐Sheldon Cheung ⭐Jane Young